- Përfundon Universiteti Veror për Demokraci në Francë. Miratohet deklarata e përbashkët

Jeni duke shikuar: Home

Për ne

Lajmet

Përfundon Universiteti Veror për Demokraci në Francë. Miratohet deklarata e përbashkët

Në përmbyllje të edicionit të 5-të të Universitetit Veror për Demokraci, 650 pjesëmarrësit kanë miratuar unanimisht deklaratën finale. “Rrethanat aktuale kërkojnë liderë vizionarë dhe kompetent, të gatshëm për tu ballafaquar me sfidat e ditëve të sotme pa sakrifikuar të nesërmen. Liderë që shndërrohen në rojtarë të parimeve demokratike, të drejtave të njeriut dhe sundimit të ligjit në këto kohë të vështira. Ne presim që ata të kuptojnë drejt rëndësinë e fuqizimit të gjeneratës së re të liderëve”, thuhet mes të tjerash në deklaratën e përbashkët. Përgjatë një jave në Këshillin e Evropës në temën “Lidershipi në Krizë”, pjesëmarrësit janë përpjekur ti përgjigjen pyetjes “A mund ta përballojmë ekonomizimin e demokracisë sot, veçmas kur shoqëritë po përballen me populizmin, nacionalizimin, korrupsionin dhe dëshpërimin social. Pjesëmarrësit u kanë bërë thirrje vendeve anëtare të Këshillit të Evropës, shteteve vëzhguesve dhe Institucioneve të BE-së që të riafirmojnë mbështetjen politike dhe financiare për Rrjetin e Shkollave për Studime Politike, duke bërë të mundur zgjerimin dhe promovimin e kulturës politike të mbështetur në respekt dhe dialog. Ky edicion i Universitetit Veror për Demokraci duhet të shërbej si promotor i rëndësishëm i shpërndarjes së këtyre vlerave në shoqëritë respektive ndërmjet politikanëve dhe vendimmarrësve. Mes të tjerash në deklaratë thuhet: "Mirëpresim për të dytën herë me radhë pjesëmarrjen e përfaqësuesve nga Afrika. Prezenca e tyre është një fakt për karakterin universal të parimeve dhe vlerave që i nënvizojnë aktivitetet e tona. Ne po shikojmë mundësinë të vazhdojmë bashkëpunimin duke hapur edhe Shkollat Politike atje”. Njëra ndër folëset në sesionin përmbyllës, Bianca Jagger, Presidente e Fondacionit Bianca Jagger për të Drejtat e Njeriut në Londër, ka folur për sfidat globale. ”Ndryshimet globale dhe kërcënimet për mjedisin janë ndër sfidat kryesore sot në botë. Ne, si qytetarë të botës, jemi përgjegjës për të ardhmen e planetit tonë”, ka thënë Jagger. Në emër të Shkollës Politike të Prishtinës ka folur Jetmir Bakija. Ai ka falënderuar organizatorët dhe pjesëmarrësit, duke u zotuar se delegacioni kosovar do të vazhdojë përpjekjet për emancipimin e mëtejmë të shoqërisë në Kosovë. Edicioni i pestë është mbajtur nga 27 Qershor – 3 Korrik 2010, në Strasburg të Francës. Në të kanë marrë pjesë 650 pjesëmarrës nga 16 Shkolla për Studime Politike dhe 20 kombësi. Në mesin e pjesëmarrësve ka qenë edhe Shkolla Politike e Prishtinës.

Kalendari 2012