 Ish negociatori për statusin e Kosovës, Albert Rohan ka ligjëruar në Shkollën Politike të Prishtinës për temën “Quo vadis Evropa”. Përgjatë një ore, Rohan para gjeneratës së dhjetë dhe Alumnive të PIPS-it ka folur për krizën aktuale në Evropë, kriza e Greqisë, eurozona, politika e jashtme e përbashkët e deri tek raportet Francë-Gjermani pas zgjedhjes së Presidentit të ri. Pashmangshëm ai ka folur edhe për Kosovën, planin Ahtisaari dhe fundin e mbikëqyrjes së pavarësisë. Aktiviteti i është pasqyruar edhe në mediat kosovare. Më poshtë, shkrimi në të përditshmen Koha Ditore
Në qershor të këtij viti, Grupi Drejtues Ndërkombëtar do të mblidhet në Vjenë. Grupi i shteteve që mbështesin pavarësinë e Kosovës do të vlerësojnë nëse Kosova ka zbatuar Pakon e Ahtisaarit plotësisht në pjesët e tjera të vendit, përpos veriut. Nëse një gjë e tillë është arritur, do të merret vendim për përfundimin e mbikëqyrjes së pavarësisë. Të njëjtin njoftim, Grupi Drejtues Ndërkombëtar do të bëjë në Prishtinë me 10 shtator. Planin e ka zbuluar në Prishtinë, ish-ndërmjetësi për statusin, Albert Rohan. Diplomati austriak që bashkë me ish-presidentin Ahtisaari kanë hartuar propozimin për pavarësinë e mbikëqyrur të Kosovës, ka thënë se ka mirëkuptim për pamundësinë e zbatimit të Pakos së Ahtisaarit aktualisht në veri, porse nuk ka zgjidhje tjetër për veriun. Gjatë një ligjërate në Shkollën Politike të Prishtinës (PIPS), Rohan ka thënë se u takon kryeministrit Hashim Thaçi dhe Qeverisë së tij që t`i bindin serbët e veriut se Plani i Ahtisaarit është i duhuri. “Është një listë e gjërave që duhet bërë për zbatimin e plotë të Pakos së Ahtisaarit në gjithë vendin deri në qershor. Në qershor do të mblidhet GND-ja në Vjenë për të marrë vendimin që të përfundojë mbikëqyrjen. Më dhjetë shtator, GND-ja do të vijë për të njoftuar këtë vendim”, ka thënë ish-ndërmjetësi. “Jam kundër ndarjes në veri. Ka shumë gjëra që serbët e veriut nuk i dinë për Planin e Ahtisaarit... Nuk ka plan tjetër për veriun, pos Ahtisaarit. Nuk ka zgjidhje tjetër për veriun pos që t`i bindin serbët se Plani i Ahtisaarit është i mirë për ta. Duhet zbatuar planin plotësisht në pjesët e tjera dhe t`u tregoni atyre se çfarë mund të bëhet me këtë plan”, ka thënë Rohan. Diplomati që është angazhuar gjatë në çështjet e Ballkanit dhe të Kosovës ka thënë se është i zhgënjyer me sjelljen e pesë vendeve anëtare të BE-së që nuk e kanë njohur pavarësinë e Kosovës. “Është i tyre gabim dhe për keqardhje. Mosnjohja e tyre nuk ka të bëjë me Kosovën, por me çështje të brendshme të tyre dhe pengon stabilizimin e këtij rajoni. Miqtë e mi në Serbi më thonë si ta njohim pavarësinë e të jemi më pak patriotë se grekët, sllovakët etj.”, ka thënë Rohan. Në ligjëratën ku ka folur për krizën aktuale në Evropë, ish-ndërmjetësi ka thënë se Bashkimi Evropian po vuan nga dilemat që nuk i ka zgjidhur prej kur është krijuar e që janë: A është federatë apo vetëm një union ekonomik?! Sipas Rohanit, vendet e BE-së e duan unionin, por nuk janë të gatshme që të heqin dorë nga sovraniteti i tyre i brendshëm dhe i jashtëm dhe kjo e dëmton unionin. “Ju e shihni këtë idenë që të flitet për politikë të jashtme të përbashkët të BE-së. Në fakt, nuk ka një të tillë. Kemi 27 politika të ndryshme të jashtme. Dhe kjo vërtetohet edhe në raport me Kosovën”, ka thënë Rohan. Sipas tij, u takon grekëve që në një të ardhme të afërt të vendosin nëse do t`i vuajnë pasojat ekonomike dhe të mbesin pjesë e Bashkimit Evropian, apo të largohen nga BE-ja dhe krahas pasojave ekonomike të shkaktojnë edhe pasoja politike. Sipas tij, vendet e Ballkanit nuk duhet të presin që BE-ja t’u tregojë se çfarë duhet të bëjnë. “Perspektiva evropiane është një moto anonime për zgjidhjen e konflikteve. Këtë e kryen procesi i zgjerimit. Nëse do të kishim një politikë të përbashkët të BE-së do të ishte më e lehtë. P.sh., nuk do të ekzistonte problemi i emrit të Maqedonisë, ose mosnjohja e Kosovës. Por te Bosnja ndryshon situata. Çështja e kushtetutës atje nuk i takon BE-së por boshnjakëve. Pastaj çështjen e zhvillimit ekonomik, sundimin e ligjit, plotësimin e kritereve të Kopenhagës nuk e bënë BE-ja. Ju vetë duhet t`i bëni”, ka thënë Rohan. |
Pėr ne 
