Instituti i Prishtinës për Studime Politike, PIPS ka publikuar të Enjten studimin “Obligimet Politike në Kosovë” të autorit Gëzim Visoka, Kandidat për PhD në Politikë dhe Marrëdhënie Ndërkombëtare Dublin City University, Irlandë. Studimi trajton raportin ndërmjet plotësimit të nevojave dhe të drejtave të përkthyera në raportet shtet-shoqëri që në gjuhën e përditshme njihen si obligimet politike.

Drejtoresha Ekzekutive e PIPS-it, Leonora Kryeziu ka thënë se botimi i këtij studimi nga PIPS është një përpjekje e radhës për të ofruar një kontribut në tranzcionin e vështirë të Kosovës. “Duke kombinuar një kornizë analitike origjinale argumente të pasura empirike, ky studim konstaton se obligimet politike janë shumë të ndërlidhura me shkallën në të cilën nevojat e njerëzve janë të plotësuara, të drejtat e tyre të njohura dhe të mbrojtura, si dhe agjencia dhe aftësitë e tyre të aktivizuara” ka thënë Kryeziu. Ajo më tej ka shtuar se studim ofron ide të vlefshme dhe pikënisje të rëndësishme nga të cilat duhet të dalë një konceptim i ri i shtetit dhe shoqërisë – në qendër të të cilit të jenë obligimet politike – dhe guxim për të gjurmuar mënyra për artikulimin e një qytetarie kritike dhe aktive, dhe pronësinë e përbashkët të institucioneve shtetërore. 

Në një ceremoni festive, Instituti i Prishtinës për Studime Politike ka shënuar 10 vjetorin e themelimit të Shkollës Politike. Para rreth 200 pjesëmarrësve të pranishëm të cilët kanë kaluar nëpër programet e Shkollës Politike prej 350 sish sa është numri i përgjithshëm, Drejtoresha e PIPS-it, Leonora Kryeziu ka folur për hapat e parë të Shkollës në vitin 2002, sfidat e asaj kohe jo shumë të relaksuar politike në bërjen bashkë të njerëzve me botëkuptime të ndryshme politike e shoqërore.